گئتمه ترسا بالاسی

اذن وئر  توی  گئجه سي  منده سنه  دايه  گليم

ال  قاتاندا  سنه  مشاطه ، تماشايه  گليم

سن بو مهتاب گئجه سي سئيره چيخان بير سرواول

اذن وئر، منده دالونجا سورونوب سايه گليم

منه ده  باخدين  او  شهلا  گؤزوله ، من  قاراگون

جرئتيم  اولمادي  بير  كلمه  تمنايه   گليم

من جهنمده ده باش ياسديقا قويسام  سنيله

هئچ آييلمام كي دوروب جنت  مأوايه  گليم

ننه  قارنيندادا  سنله أكيز  اولسيديم  اگر

ايسته مزديم دوغولوب بيرده بو دنيايه گليم

سن ياتيب جنتي  رؤياده گؤرنده  گئجه لر

منده جنتده قوش اوللام ،كی او رؤيايه گليم

قيتليغ ايللر ياغشي تك قورويوب گؤزياشميز

كوي  عشقونده  گرك بيرده  مصلايه  گليم

سنده صحرايه مارال لار كيمي بير چيخ،نولي كی

منده بير صيده چيخانلار كيمي،صحرايه گليم

آللاهوندان سن اگر قورخميوب ،اولسان ترسا

قورخورام منده دؤنوب دين مسيحايه  گليم

شيخ صنعان كيمی  دونقوز  اوتاريب  ايللرجه

سني بير گؤرمك ايچون معبد ترسايه  گليم

يوخ صنم ! آنلاماديم ، آنلاماديم ، حاشا من

بوراخيم مسجديمي ، سنله كليسايه گليم !

گل چيخاق طورتجلايه، سن اول جلوه ي طور

من ده موسي كيمی ، اوطوره تجلايه گليم

شيردير« شهريار» ين شعری ، الينده شمشير

كيم دئيه ر من بئله بير شيرله دعوايه گليم

گله جک

بو یاساق دیللی ائلین دردینه درمان گله جک

تاپدالانمیش آنانین گؤوده سینه جان گله جک

قورودوب لارسا کؤکوندن بو ائلیمیزین دامارین

بیر گون آمما بو دامار ایچره اینان قان گله جک

بیر زامان لار ائلی آغلاتدی آرازین هارایی

یئنه شنلیک هارایی بیرده آرازدان گله جک

چکدیلر ناحق ایله حق دانیشانلاری دارا

نه یامان گوندو بو آللاه – سویله: ایمان گله جک

گئتدی ستارلار آمما – قانلاری دامدی بو یولا

دیز قویوبلار یئنه ده یوللارا اینسان گله جک

دای گوناه دیر می دانیشماق دا آنانین دیلینه ؛

هاردا یازدین سؤیله آللاه یئنی قورآن گله جک

تالانیب دیر اؤز قیزیل بایراقی آلتیندا ائلیم

آمما بیر گون بیلیرم دونیایا وجدان گله جک

باخین اؤزگورلوک آچیب قوللاری بابک ائلینه

سسیمیزدن (( یاشاسین آذربایجان )) گله جک

گله جک بیزیم دیر